ဗိုလ်အောင်မင်းကွေ့
ပေါက်ခေါင်း - အုတ်တွင်းလမ်း မိုင်တိုင် ၄၉ / ၂ မှာ ဗိုလ်အောင်မင်းကွေ့ လို့ရေးထားတဲ့ ဆိုင်းဘုတ်တစ်ခုရှိတယ်။
အဲဒီအချိန်ကလမ်းကအခုလိုမကျယ်သေးဘူး။ တောင်ကြောနဲ့ ချောက်ကမ်းပါးကြားမှာ ကျဉ်းကျဉ်း လေးပဲ။ဗိုလ်အောင်မင်းတပ်စုကကားလမ်းအတိုင်း လာနေတဲ့အချိန်ဗကပတပ်ဖွဲ့က ကလမ်းဘယ် ဘက်တောင်ကြောပေါ်နဲ့ လမ်းညာဘက် ချောက်ကမ်းပါးထိပ် ကနေ ညှပ်ပြီးတိုက်တယ်။ အမှန် ကတော့ တပ်စုတစ်စုလုံးကို သတ်ကွင်းထဲသွင်းပြီး အပိုင် တိုက် တာ။ ဒီလိုတိုက်ပွဲမျိုးကို စိန်ကန့် လန့် ဘက်မှာ တိုက်ခဲ့ဖူးတယ်၊ တပ်မတော်ဘက်က အတော်များ များကျဆုံးပြီး လက်နက် တွေ လည်း ပါကုန်တယ်လို့ ဆိုတယ်။ အခုလည်း ဗိုလ်အောင်မင်း တပ်စုကို အပိုင်တိုက်တာပဲ။ ဒီနေရာ က တပ်မတော်စခန်းရှိတဲ့ ပေါ်လံကြီးရွာကို ရောက်ဖို့ နှစ်မိုင်လောက်ပဲလိုတော့တာဆိုတော့ စခန်း ရောက်တော့မယ်ဆိုပြီး ရဲဘော်တွေ ပေါ့ပေါ့လျော့လျော့ဖြစ်လာတတ်တဲ့ အခြေအနေကို အခွင့်ကောင်းယူတာလည်း ပါတယ်။ ပေါ်လံကြီးစခန်းက ပေါ်လံကြီးတံတားနား က တောင်ကုန်း ပေါ်မှာရှိတယ်။ အခုတော့ ဆောက်လုပ်ရေး လမ်းစခန်းဖြစ်နေပြီ။
ပေါက်ခေါင်းတစ်ဝိုက်မှာတော့ ဗိုလ်အောင်မင်း ကွေ့တိုက်ပွဲက အခုအချိန်ထိ ပြောစမှတ်တွင်နေ တုန်းပဲ။ အခု အသက်ခြောက်ဆယ်တန်းတွေ အဲဒီအချိန်က ကလေးအရွယ်တွေ အစသိတယ်။ ကျွန်တော့် ကို ဒီတိုက်ပွဲအကြောင်းပြောပြတာက အသက် ၈၃ နှစ်အရွယ် ဂုံမင်းခုံ ရွာသားအဘ ဦးငွေထွန်း။ သူက ဗကပတွေအကြောင်းအတော်သိတယ်။ သူတောင် ဗကပ လုပ်ခဲ့သေးလား မသိ ဘူး။ မေးရင်တော့ မလုပ်ဘူးလို့ ပြောတာပဲ။
အဲဒီဒေသက လူတွေကတော့ ဗိုလ်အောင်မင်းဆိုတာ သမ္မတရုံး၀န်ကြီးဟောင်း ဦးအောင်မင်း လို့ ပြောကြတယ်။ ဟုတ်မဟုတ် တော့ ဦးအောင်မင်းနဲ့ တွေ့မှ မေးကြည့်ရမှာပဲ။
ဦးရဲထွဋ်
No comments:
Post a Comment