တိုင်းပြည်ကိုဖျက် အရက်အဆင့်သို့

တိုင်းပြည်ကိုဖျက် အရက်အဆင့်သို့

ကျနော်တို့ တိုင်းပြည်ဟာ အင်မတန် အံ့သြစရာတွေ များတဲ့တိုင်းပြည်ပါပဲ ။ ကျနော်တို့ငယ်စဥ် ကျနော်တို့မြို့မှာ ပွဲရုံလုပ်ငန်း ၊ ဆီစက်လုပ်ငန်း နဲ့ ဆေးလိပ်ခုံလုပ်ငန်းတွေ အလွန်များပြားခဲ့ပြီး အလုပ်အကိုင်လည်း အလွန်ပေါများခဲ့ပါတယ် ။

ကျနော်ငယ်စဥ်ကဆိုရင် အရက်သောက်ကြတဲ့ လူကြီးတွေဟာ အစိုးရအရက်ဖြူဆိုင်က BE ကို ခွဲတမ်းနဲ့ (တယောက် တပိုင်း) သောက်ကြရပါတယ် ။ ပြင်ပက ချက်အရက်ဆိုတာကလည်း ထန်းလျှက်သီးသန့် နဲ့ ချက်ထားတဲ့ အရက်ပဲ ရှိပါတယ် ။

---

လူကြီးတွေ အရက်သောက်ကြတာကလည်း မနက်လင်းတာနဲ့ ပွဲရုံ ၊ ဆီစက် ၊ ဆေးလိပ်ခုံတွေကို သွားပြီး တနေကုန် အလုပ် လုပ်ကြပါတယ် ။ ညနေစောင်းမှ တယောက်ကို BE တပိုင်းမော့ပြီး လမစ်ပြီးသွားပါတယ် ။

အဲဒီလူကြီးတွေဟာ ကျန်းမာသန်စွမ်းကြပါတယ် ။ အသက်ရှည်စွာ နေခဲ့ကြရပါတယ် ။ ကျနော်တို့ အရွယ်ရောက်လာတော့ ၈၈ နောက်ပိုင်းမှာ အရက်ချက်စက်ရုံတွေ မှိုလိုပေါက်လာပါပြီ ။

သူတို့အရက်ချက်နည်း ဖော်မြူလာတွေထဲမှာ ပုလဲဓာတ်မြေသြဇာတွေပါ ထည့်ချက်ကြပါတယ် ။ အဲဒီ စက်ရုံက ထွက်လာတဲ့ အရက်အဆီ (ရေ လေးဆ မရောမှီ) ထည့်ထားတဲ့ စဥ့်အိုးကြီးကို အတွင်းက အရက်အဆီအား ခဏမွှေနှောက်ပြီး အပြင်မှ လက်နဲ့ စမ်းကြည့်ပါက မီးကင်ထားသကဲ့သို့ အပူကူးလာတာ တွေ့ရပါတယ် ။

နောက် ချက်အရက်လောက ကို ပြန်ကြည့်ပါ ။ ပေါက်ကရ ဓာတုကုန်ကြမ်းတွေနဲ့ ချက်နေကြပါပြီ ။ အဆိုးဆုံး တွေ့ရတာက အင်ဒရင်း အဆိပ်ပြင်းအား နှီးစလေးနဲ့ တို့စိမ်ပြီး ယင်းနှီးစဖြင့် ချက်အရက်အား မွှေပေးရတာ မြင်ဖူးပါတယ် ။

ဒီတော့ ဘာတွေဖြစ်လာသလဲ လေ့လာကြည့်ပါ ။ အရက်တွေ အင်မတန်ပေါလာပါပြီ ။ အရက်စျေးကလည်း ရေသန့်စျေးထက် နည်းနေပါပြီ ။ ယခုတော့ ကျနော်မသိပါဘူး ယခင်က ရေသန့် တဗူး ၃၀၀ိ ဖြစ်ချိန်မှာ မြင်းခြံက ချက်အရက် တလုံး ၂၅၀ိ ဆိုတာ ပုံပြင်မဟုတ်ပါဘူး ။

တချိန်က ကာယလုပ်သားတွေဟာ အင်မတန်သန်မာပြီး လုပ်နိုင်ကိုင်နိုင်ကြပေမယ့် ကျနော်တို့ အရွယ် ကာယလုပ်သားတွေကျတော့ ခွန်အားမဲ့ကုန်ပါပြီ ။ အရက်က အချိန်တိုအတွင်း ကောင်းစွာ ဖျက်ဆီးလိုက်ပါပြီ ။

အသက်ငယ်ငယ်နဲ့ ရောဂါပေါင်းစုံရပြီး ဗိုက်ပူနံကားနဲ့ မိသားစုရဲ့ ဒုက္ခအိုး အရက်သမားမျိုးဆက်ကို မွေးဖွားပေးခဲ့ပါပြီ ။ အမြဲတမ်းလိုလို ခရီးထွက်နေရတဲ့ ကျနော်လည်း ခရီးတခေါက် ပြန်လာလိုက် သူငယ်ချင်း အရက်သမားတယောက် သေသွားလိုက်နဲ့ လွန်ခဲ့တဲ့ ဆယ်နှစ်လောက်မှာတော့ ရာနဲ့ချီနေတဲ့ ကျောင်းနေဖက် ငယ်သူချင်းတွေ ဆယ်ဂဏန်းမျှသာ ကျန်ပါတော့တယ် ။

သတိထားမိတာက အနုပညာသည်တွေ ၊ စာရေးဆရာတွေ အရက်ကို အမွှမ်းတင် ရေးပြ ရိုက်ပြနေတာလည်း အတုခိုးဖို့ ဖြစ်နေတာ လက်တွေ့သိမြင်ခဲ့ရပါတယ် ။ မြန်မာပေါကားတွေမှာ အရက်သောက်ခန်း မပါတဲ့ဇာတ်ကား လက်ချိုးရေလို့ ရနေတာ သတိပြုမိကြမယ် ထင်ပါတယ် ။

ယခုဆိုရင် မိန်းကလေးများပါ သောက်တာ စားတာကို ပြောလာကြပါပြီ ။ အရက်အပေါစားတွေ စျေးပေါပေါနဲ့ ရနေတာ အလွန်ကြီးမားတဲ့ အန္တရာယ်လို့ ရှုမြင်သင့်ပါပြီ ။

PMG ခေတ်ကောင်းတုန်းက တနေ့ကို ရေကူးကန် နှစ်ကန်စာ ချက်တာတောင် မလောက်ဖူးတဲ့ ။ ယခု နာမည်ကြီးတံဆိပ်တမျိုးဆိုရင် တနေ့ ဂါလံ ၅၀၀၀ အနည်းဆုံး ချက်ကုန် ဖြစ်နေပါတယ် ။

အဲဒါကြောင့် အရက်အပေါစားတွေ ခိုးချက်နေကြတာကို ပြင်းထန်တိကျစွာ ဖော်ထုတ်အရေးယူရပါ့မယ် ။ ဖမ်းဆီးလိုလျှင် နယ်မြေခံ ရဲ နယ်ထိမ်းများ အားလုံး သိပြီးသားပါ ။

အရက်ချက်စက်ရုံများအား အခွန်ကြီးစွာကောက်ခံခြင်း ၊ အရက်​ရောင်းချခွင့် (ဆိုင်)လိုင်စင်များအား ကြီးလေးသော အခွန် သတ်မှတ်ခြင်း ဖြင့် အရက်အမျိုးမျိုးအာ စျေးကြီးအောင် ဖန်တီးသင့်ပါတယ် ။

ဂျာမဏီလို လုပ်အားခ မြင့်မားသော တိုင်းပြည်မျိုးမှာ အရက်ကို သာမန်လူတန်းစား မသောက်နိုင်အောင် အခွန်နဲ့ စျေးကြီးစေရန် ဖန်တီးထားလို့ အရက်တပက် ကနေ နှစ်ပက် သောက်ဖို့ မလွယ်ပါဘူး ။

ကျနော်တို့ဆီမှာ ယခု ချက်အရက်တလုံး ၅၀၀ / ၆၀၀ နဲ့ ရနေတာ လူငယ်တွေအတွက် လက်တည့်စမ်းဖို့ အလွန်လွယ်ကူနေပါတယ် ။ အရက်ကနေတဆင့် မူးယစ်ဆေးလမ်းကြောင်း ၊ လောင်းကစားလမ်းကြောင်း ၊ မိန်းမအပျော်အပါး လမ်းကြောင်းပေါ်သို့ လွယ်လင့်တကူ ကူးပြောင်းမြူဆွယ်နိုင်ပါတယ် ။

မြန်မာလူငယ်တွေရဲ့ အနာဂါတ်ကို ကုစားချင်တယ် ဆိုရင်တော့ မူးယစ် နဲ့ အရက်ကို အမြန်ဆုံး ​အပြင်းထန်ဆုံး ဖြတ်တောက်နိုင်မှ အောင်မြင်ပါမယ် ။ ယနေ့ PDF အများစုဟာ အရက် မူးယစ်တို့ရဲ့ ကျေးကျွန်တွေများပါတယ် ။

- တရက်လက်နှစ်လုံးပဲ သောက်ဆိုလို့ လင်ဗန်းထဲ ထည့်သောက်တဲ့ မြန်မာအရက်သမားများ....

- ကြည့်သောက် သေလိမ့်မယ်ဆိုလို့ မှန်ကြည့်သောက်တဲ့ မြန်မာအရက်သမားများ..

- သူများတွေ အရက်ကစွဲတယ် ပြောကြပေမယ့် ငါဖြင့် နေ့တိုင်း နေ့ရောညရော သောက်နေတာ မစွဲပေါင် ဆိုတဲ့ မြန်မာအရက်သမားများအား.....

ရည်ညွှန်းလျှက် .....

- စည်းကမ်းတကျ လူလိုသူလို သောက်စားတတ်သူများအတွက် ဆေးဖြစ် ဝါးဖြစ် မှီဝဲခြင်းကို ကဲ့ရဲ့လိုရင်း မရှိပါဘူး ။

Credit: ကိုရွှေမျိုးဝင်း